Жан-Клод Блан «Манчестер Юнайтед» директорлар кеңесінен кетті

Companies House мәліметіне сәйкес, Жан-Клод Бланның «Манчестер Юнайтедтегі» директор ретіндегі өкілеттігі екі апта бұрын тоқтатылды.

Футбол индустриясындағы тәжірибелі функционер — бұған дейін «Ювентус» пен «Пари Сен-Жерменде» жетекшілік қызмет атқарған. Ол клубтың директорлар кеңесіне сэр Джим Рэтклифф «Юнайтед» үлесінің бір бөлігін сатып алғаннан кейін қосылған болатын.

Премьер-лигадағы соңғы акционерлер жиналысында клубты жаңа атқарушы директор Омар Беррада мен Ineos компаниясының қаржы директоры Роджер Белл таныстырды.

Блан Ineos компаниясының бас директоры лауазымын сақтай отырып, енді «Манчестер Юнайтедтің» УЕФА мен ФИФА-дағы мүдделерін білдірумен шектеледі. Еске сала кетейік, өткен жазда ол клубта 250 жұмыс орнын қысқарту туралы шешім қабылдаған тұлғалардың бірі болған.