WBO Усикті Паркермен титулды қорғауға міндеттеді

Дүниежүзілік бокс ұйымы (WBO) титулды міндетті түрде қорғау туралы шешім қабылдады. Ауыр салмақтағы бірыңғай чемпион Александр Усик (23-0, 14 КО) уақытша чемпион Джозеф Паркермен (36-3, 24 КО) кездесуі тиіс, деп хабарлайды Vringe.com.

Ресми хабарламалар екі боксшының промоутерлеріне — K2 Promotions-тан Александр Красюкке және Queensberry Promotions-тан Фрэнк Уорренге жіберілді. WBO президенті Густаво Оливиери бұл шешімді растады — бұл әр салмақ дәрежесінде бір чемпион болуы туралы ұйым саясатына сәйкес келеді.

Келіссөздер жүргізуге тараптарға 30 күн берілді — келісімге қол жеткізілмеген жағдайда WBO промоутерлік сауда-саттық тағайындайды. Айта кетерлігі, кеше Усиктің командасы Уорреннің промоутерлік компаниясы ұсынған IBF чемпионы Дэниел Дюбуамен келіссөздер процесін бастаған болатын.