UFC пен Meta көпжылдық серіктестік орнатты

UFC ұйымы жанкүйерлермен өзара тығыз байланыста болу мақсатында Meta компаниясымен көпжылдық серіктестік келісіміне қол қойды. Бұл туралы UFC ресми түрде хабарлады.

Meta UFC тарихындағы жанкүйерлермен жұмыс істейтін алғашқы ресми технологиялық серіктес атанды. Ұйым Meta-ның барлық негізгі платформаларын қолданатын болады: Meta AI, Meta Glasses, Meta Quest, Facebook, Instagram, WhatsApp және Threads.

UFC президенті және бас директоры Дана Уайт:

«Жылдар бойы бұл спортты дамытуға көмектескен көптеген тамаша серіктестерім болды, бірақ Марк пен оның Meta командасы UFC жанкүйерлерін таң қалдыратын дүниелер жасағалы отыр», — деп мәлімдеді.

Meta негізін қалаушы және бас директоры Марк Цукерберг те пікір білдірді:

«Мен бұл спортты жақсы көремін және жанкүйерлерге оны жаңаша сезінуге мүмкіндік беру үшін UFC-мен жұмыс істеуді асыға күтемін».

Threads платформасы UFC-тің әлеуметтік желілердегі ресми серіктесіне айналады. Онда турнирлердің басты сәттері мен эксклюзивті контенттер жарияланады.

Сондай-ақ Meta бренді барлық Pay-Per-View және Fight Nights турнирлерінде — тікелей трансляцияларда және октагонда көрсетілетін болады.