Теннис жұлдыздары Үлкен дулыға турнирлерінен өзгеріс талап етуде

Associated Press агенттігінің хабарлауынша, әлемнің жетекші теннисшілері Үлкен дулыға турнирлерінің ұйымдастырушыларына арнайы хат жолдады. Онда ойыншылар өз құқықтарын кеңейту мен сыйақы жүйесін әділ етуге бағытталған талаптар қойған.

Құжатқа ATP рейтингіндегі үздік ондық пен WTA-ның топ-11 өкілдері қол қойған. Бір ғана ерекшелік — қазақстандық теннисші Елена Рыбакина бұл хатқа қол қоймаған.

Қол қойған танымал теннисшілер қатарында:

• Янник Синнер
• Александр Зверев
• Карлос Алькарас
• Даниил Медведев
• Новак Джокович
• Арина Соболенко
• Ига Швентек
• Коко Гауфф
• Джессика Пегула

Теннисшілердің негізгі талаптары:

1. ATP және WTA әлеуметтік қамсыздандыру қорларын тұрақты қаржыландыру.
2. Турнир жүлде қорларын әділ табыс үлесіне сай ұлғайту.
3. Жарыс ережелері мен ұйымдастыру шешімдеріне ойыншылардың дауыс беру құқығын енгізу.

Сонымен қатар, спортшылар өз өкілдерінің Мадрид турнирі кезінде Үлкен дулыға турнирлерінің басшыларымен — Tennis Australia, Франция теннис федерациясы, Бүкілағылшын лаун-теннис клубы және USTA өкілдерімен кездесуін ұйымдастыруды ұсынды.