«Team Liquid» ойыншылары PGL Wallachia Season 3 жеңісі туралы пікір білдірді

PGL Wallachia Season 3 турнирінде жеңіске жеткеннен кейін «Team Liquid» ойыншылары әсерлерімен бөлісті. Команда мүшесі Йонас «SabeRLighT-» Волек әріптестерінен сұхбат алды.

Метьюс «Jabbz» Фрисель бапкермен сұхбат барысында драфттар мен команданың дайындығы туралы сөз қозғады.

«Мен өзімді драфт жасау бойынша данышпан санамаймын. Менің ойымша, бұл рөлге Михал «Nisha» Янковски лайық. Ол нағыз драфт шебері. Ал мен тек: «Иә, Dota ойнаймыз» деп айтумен шектелдім. Сонымен қатар, командадағы әрбір ойыншымен мақтанамын. Иә, біз бұрын нашар ойнадық, бірақ көп еңбектеніп, қазір шын мәнінде мықтымыз. Жеңіс үшін барымызды салдық, бұл қуантады», – деді Jabbz.

Майк «miCKe» Ву команда бапкері Уильям «Blitz» Лидің турнирге визалық мәселелерге байланысты қатыса алмағанын әзілмен атап өтті. Blitz-тің анасы да қалжыңға қосылып, ұлына команда оның көмегінсіз де жеңіске жете алғаны туралы хабарлама жіберген.