«Team Falcons» құрамында өзгеріс болуы мүмкін: Malr1ne ESL One Raleigh 2025 турнирін өткізіп алады

DLTV.org мәліметінше, «Team Falcons» Dota 2 құрамында ESL One Raleigh 2025 турнирі қарсаңында өзгеріс болуы мүмкін. Команданың мидері Станислав «Malr1ne» Поторак жарысқа қатыса алмайды.

Ойыншының қатыспауына АҚШ визасын алу мәселесі себеп болуы мүмкін. Қазіргі таңда оның орнына Эйбэд «Abed» Юсоп уақытша ойнауы мүмкін деген ақпарат бар, бірақ ұйымнан ресми мәлімдеме әлі түскен жоқ.

Malr1ne бұған дейін де виза мәселесіне байланысты турнирді жіберіп алған — ақпан айында ол DreamLeague Season 25 турнирінің екінші топтық кезеңінде команда құрамында бола алмады. Ол кезде «Team Falcons» сапына Саид «SumaiL» Хассан стендин ретінде қосылғанымен, ұжым плей-оффқа өте алмады.

ESL One Raleigh 2025 турнирі 7 сәуірде АҚШ-та басталады. «Team Falcons» алғашқы ойынын 8 сәуірде, B тобында «Tundra Esports» командасына қарсы өткізеді. Жарыстың жүлде қоры — 1 миллион доллар.