Шавкат Рахмонов өзінің балалық қорқынышы туралы айтты

UFC жартылай орта салмақ рейтингінде үшінші орында тұрған Шавкат Рахмонов жақында Naiza TV-ге берген сұхбатында балалық шақтағы қорқыныштары туралы ашық айтты. Спортшы бала кезінде қараңғыда сыртқа шығудан қатты қорыққанын мойындады.

«Шынымды айтсам, мен бала кезімде түнде сыртқа шығудан қатты қорықтым. Бұл менің балалық шақтағы басты қорқынышым болды,» – деп еске алды Рахмонов.

Жауынгер қараңғылықтың оған жалғыздықтан қорқу сезімін тудырғанын және қиялында жындардың бейнесін салғанын айтты. Тіпті, көшедегі дәретханаға бару да қиын болған екен. «Дәретханаға сыртқа бару керек болса да, алысқа бармадым,» – деді ол күлімсіреп.

Сонымен қатар, бала кезінде ол қан жоғалтудан да қорыққан. Үлкен ағасының әзілдері бұл қорқынышын күшейте түскен: «Егер мен бір жерде өзімді кесіп алсам, өлемін деп қорқатынмын. Себебі ағам: ‘қазір сенің барлық қаның ағып жатыр’ деп айтатын. Мен бірден қорқып қалатынмын,» – деп бөлісті Шавкат.

Қазір Шавкат бұл қорқыныштарын әзілмен еске алады. Ол енді тауларда жалғыз жүре алатын дәрежеге жеткенін және балалық қорқыныштардан арылғанын атап өтті.

Айта кетейік, 7 желтоқсанда Лас-Вегаста Шавкат Рахмонов қазіргі чемпион Белал Мұхаммедке қарсы UFC титулы үшін маңызды жекпе-жекке шығады. Балалық қорқыныштар артта қалып, жауынгердің бойында тек күрескерлік рух пен шешімділік қалғаны байқалады.