Промоутер Хирн Биволды әлемдегі екінші үздік боксшы деп атады

Championat.com мәліметі бойынша, жартылай ауыр салмақтағы (79,4 кг дейін) жаңа абсолют чемпион Дмитрий Биволдың қосалқы промоутері Эдди Хирн өз қарамағындағы боксшының жақындағы жетістігінен кейінгі мәртебесіне баға берді.

Баспасөз мәслихатында Хирн өз пікірін білдірді:

Бивол әлемнің үздік боксшысы Сауль Альваресті жеңгенін есте сақтау керек. Және бұл pound-for-pound рейтингісінің топ-5-тегі абсолют әлем чемпионын жеңген жігіт. Мен үшін бұл Биволды үздік деп атауға себеп. Әрине бірінші орын Усикке тиесілі, бірақ мен үшін Бивол — әлемдегі нөмір екінші боксшы.

Еске сала кетейік, Артур Бетербиев пен Дмитрий Бивол арасындағы біріктіру жекпе-жегі 22-ден 23-не қараған түні Эр-Риядта (Сауд Арабиясы) өтті. Төрешілер шешімімен жеңіске Бивол жетті — 114-114; 116-112; 115-113.