Нигериялық шабуылшы Адемола Лукман Африканың 2024 жылғы үздік футболшысы атанды

Дүйсенбі күні Марокконың Марракеш қаласында Африка футбол конфедерациясының (КАФ) марапаттау рәсімі өтті, онда Адемола Лукман Африканың 2024 жылғы ең үздік футболшысы атанды. Бұл туралы КАФ-тың ресми сайтында жарияланды.

27 жастағы нигериялық шабуылшы «Аталанта» клубы мен Нигерия ұлттық құрамасы сапындағы жарқын ойынымен осы беделді марапатқа ие болды. Лукман Бергамаски клубының тарихи жетістігіне үлкен үлес қосты, Еуропа лигасының финалында хет-трик жасап, «Аталантаға» 117 жылдағы алғашқы еуропалық кубокты жеңіп алуға көмектесті.

Халықаралық аренада Лукман өзін сенімді түрде көрсетті. Ол 2024 жылғы Африка Ұлттар кубогында үш гол соғып, Нигерия құрамасын турнир финалына алып шықты. Алайда шешуші матчта «Супер бүркіттер» Кот-д’Ивуардан Себастьян Аллердің кеш соғылған голының арқасында жеңіліп қалды.

2023/24 маусымында Лукман барлық турнирлерде «Аталанта» үшін 45 матчта 17 гол соғып, 10 нәтижелі пас берді. Қазіргі маусым да ол үшін сәтті басталды – 19 ойында 11 гол соғып, командаға Джан Пьеро Гасперини басқарған «Аталантаның» А Сериясы турнир кестесінде көш бастауына көмектесуде.

Африканың үздік футболшысы атағы үшін күресте Лукман марокколық Ашраф Хакими, Оңтүстік Африканың қақпашысы Ронвен Уильямс, «Боруссия Дортмунд» шабуылшысы Серу Гирасси және «Брайтон» ойыншысы Симон Адингра сияқты мықты қарсыластарынан озып шықты. Ол өткен жылғы бұл атақты жеңіп алған жерлесі Виктор Осимхеннің орнын басты. Бұған дейін бұл марапатқа Садио Мане, Мохамед Салах, Пьер-Эмерик Обамеянг және Рияд Марез сияқты жұлдыздар лайық деп танылған еді.

«Бұл сыйлықты алу – мен үшін үлкен мәртебе. Осы жолда мені қолдаған барлық адамдарға алғыс білдіремін,»– деді Лукман марапаттау рәсімінен кейін.

Аталған номинациядағы рекордшылар – камерундық Самуэль Это’о мен ивуарлық Яя Туре, әрқайсысы төрт рет Африканың үздік ойыншысы атанған.

Әйелдер арасындағы номинацияда Замбия футболшысы Барбра Банда жеңіске жетті. Ол «Орландо Прайд» клубын АҚШ-тың Ұлттық әйелдер футбол лигасының чемпионы атандырды, финалда «Вашингтон Спиритке» қарсы шешуші гол соқты.