Наполи бапкерінің көмекшісі Болоньямен тең түскен ойынға баға берді

Football Italia хабарлағандай, Кристиан Стеллини Серия А аясында «Наполи» мен «Болонья» арасындағы (1:1) тең ойынға қатысты пікір білдірді.

Қазіргі таңда «Наполи» турнир кестесінде екінші орында тұр — көш бастап тұрған «Интерден» үш ұпайға қалып келеді.

«Біз маңызды нәрсе үшін күрескіміз келеді. Бірақ маусым басында алдымызға үздік төрттікке кіру мақсатын қойғанымызды да ұмытпауымыз керек. Сондықтан бүгінгі ұпай — сол жолдағы маңызды қадам. Егер біз психологиялық тұрғыдан өсіп, екінші таймда қарқын, сапа мен жылдамдықты сақтауды үйренсек, бұдан да үлкен нәрсеге ұмтылуға болады», — деді Стеллини.

Айта кетейік, «Наполидің» бас бапкері Антонио Конте бұл ойынды дисквалификацияға байланысты трибунадан тамашалады.

Біздің парақшамыздан футбол матчтарының барлық нәтижелерін Live форматта бірінші болып біліңіз!