«Манчестер Юнайтедтің» бұрынғы бапкері Кения құрамасын басқарды

BBC Sport Africa мәліметінше, Бенни Маккарти Кения құрамасының бас бапкері болып тағайындалды. Оңтүстік африкалық маман екі жылдық келісімшартқа қол қойып, уақытша бапкер Фрэнсис Киманзиді алмастырды.

2026 жылғы әлем чемпионатына іріктеу F тобында Кения құрамасы төртінші орында тұр (4 ойында 5 ұпай жинаған) және көшбасшы Кот-д’Ивуардан 5 ұпайға қалып келеді.

«Әлем чемпионатына қатысу — бұл әлемдегі ең ерекше сезімдердің бірі, және мен оларға осыны сыйлағым келеді. Ойыншылардың дұрыс көзқарасы мен өзін-өзі толық беруімен біз көптеген адамдарды таңғалдыра аламыз», — деді Маккарти.

47 жастағы маманның еуропалық футболда мол тәжірибесі бар. Ол «Аякспен» Нидерланд чемпионатын жеңіп алды, 2004 жылы «Портумен» Чемпиондар лигасын ұтты, сондай-ақ АПЛ-де «Блэкберн» мен «Вест Хэм» сапында ойнады. Соңғы уақытта Маккарти «Манчестер Юнайтедтің» жаттықтырушылар штабында жұмыс істеді.

Айта кетейік, 2027 жылы Кения Танзания және Угандамен бірге Африка ұлттары кубогын қабылдайды. Бұл жаңа бапкер үшін тағы бір маңызды міндет болмақ.