Льюис Хэмилтон Жапония Гран-приі алдында жаңа киім топтамасын таныстырды

«Ferrari» пилоты Льюис Хэмилтон өзінің +44 бренді мен жапон суретшісі Сораяма арасындағы ынтымақтастықтың нәтижесі — жаңа +44 x Sorayama INFINITY киім топтамасын ұсынды. Жаңа коллекция Жапония Гран-приіне орай таныстырылды.

Топтамада қызыл және қара түстер, сондай-ақ хромдалған робот-единорог бейнесі ерекше көзге түседі. Бұл жолы ассортиментке скейтборд тақтайы да алғаш рет енгізілген.

«Біз екеуіміз де сән мен автокөлік мәдениетін жақсы көреміз. Топтаманың шабыт көзі де осы», — деді Хэмилтон.

Айта кетейік, жеті дүркін әлем чемпионы сән индустриясына қызығушылығын осыдан 15 жыл бұрын бастаған. Ол бұған дейін Tommy Hilfiger брендімен жұмыс істеп, Dior және Lululemon елшісі атанған болатын.

Коллекциядағы заттардың бағасы 14 пен 233 фунт стерлинг аралығында. Түскен табыстың бір бөлігі Льюистің Mission 44 қайырымдылық қорына аударылады.