Лэйн Хатсон — Колдер Трофи жүлдесіне басты үміткер

The Hockey News мәліметінше, «Монреаль Канадиенс» командасының қорғаушысы Лэйн Хатсон НХЛ-дің үздік жаңа ойыншысына берілетін «Колдер Трофи» жүлдесінің басты фавориті атанды.

Басылым жүргізген сауалнамаға қатысқан 40 сарапшының 29-ы жас қорғаушыны қолдап дауыс берген. Екінші орында «Калгари» қақпашысы Дастин Вульф (6 дауыс), ал үшінші сатыда «Сан-Хосе» шабуылшысы Макклин Селебрини (5 дауыс) орналасқан.

Таңқаларлығы, «Филадельфия» шабуылшысы Матвей Мичков биылғы маусымда жаңа ойыншылар арасында ең көп шайба соққанымен (80 ойында 26 гол), бірде-бір сарапшыдан дауыс алмады.

Хатсон 82 матчта 60 нәтижелі пас беріп, НХЛ тарихындағы жаңа қорғаушылар арасындағы рекордты қайталады.