Associated Press хабарлауынша, швед жартылай қорғаушысы Кристоффер Ольссон денсаулығына байланысты даттың «Мидтьюлланд» клубынан кетуге мәжбүр болды.
29 жастағы футболшы биыл ақпанда естен танып, ауруханаға жеткізілген болатын. Дәрігерлер оның миында қан ұйығына әкелген сирек қабыну процесін анықтаған. Қарқынды ем қабылдағаннан кейін, Ольссон оңалту орталығына ауыстырылды.
«Бұл — өмір соққы берген кезде адамның күш-жігері туралы оқиға. Ол бізге батылдықтың не екенін көрсетті», — деді клубтың спорт директорының орынбасары Кристиан Бак Нильсен.
Футболшы клубтың қолдауына алғысын білдірді:
«Клуб, адамдар, айналамдағы барлық жан — олар бірінші секундтан бастап қасымда болды. «Мидтьюлланд» жай ғана футбол клубы емес — бұл адамдарға қамқорлық жасайтын орын», — деді Ольссон.
Швеция құрамасында 47 матч өткізген жартылай қорғаушы енді отбасының жанында емін жалғастыру үшін еліне оралады.
Еске салайық, Ольссон 2019–2021 жылдары «Краснодар» сапында 80 матчқа қатысқан болатын.
Біздің парақшамыздан футбол матчтарының барлық нәтижелерін Live форматта бірінші болып біліңіз!
