Қазақстандық биатлоншылар Харбиндегі Азиадада алтын және күміс медаль жеңіп алды

Харбинде (ҚХР) өтіп жатқан қысқы Азия ойындарында биатлон-спринт жарысында Қазақстан спортшысы Владислав Киреев алтын медаль иеленді.

10 шақырымдық қашықтықтағы жарыс қазақстандық спортшылардың сенімді жеңісімен аяқталды: Вадим Куралес көшбасшыдан 25,7 секундқа қалып, күміс жүлдеге қол жеткізсе, қытайлық Гу Цань (+29,7) қола медаль иеленді.

Қазақстан құрамасының басқа өкілдері Асет Дюсенов пен Александр Мухин да жоғары нәтиже көрсетіп, тиісінше 6-шы және 7-ші орындарды еншіледі.

Жалпы медаль саны бойынша Қазақстан қоржынында қазір 3 алтын, 6 күміс және 4 қола медаль бар. Қысқы Азия ойындары 14 ақпанға дейін жалғасады.