«G2 Esports» бапкері команда өнеріне пікір білдірді

«G2 Esports» командасының CS2 бойынша жаттықтырушысы Виктор «TaZ» Войтас ESL Pro League Season 21 турниріндегі ойын туралы өз ойымен бөлісті. Команда жарысты ширек финалда аяқтады.

Трансляция барысында жаттықтырушы снайпер Илья «m0NESY» Осиповтың прогресін ерекше атап өтті:

«Барлығы «m0NESY»-дің ойыны мен көңіл-күйіндегі өзгерісті байқады деп ойлаймын. Илья қайтадан бабына келді. Бірақ қорғаныста ойнағанда үнемі алғашқы фрагті жоғалтып отырсаң, өзіңді көрсету қиын. Егер CT жағындағы ойынымызды жақсартсақ, нәтижеміз де жақсырақ болады.»

Войтас командаға көп демалуға болмайтынын айтып, жаттығуды жалғастыру керектігін атап өтті:

«Бізге бірнеше күндік демалыс беріледі, бірақ содан кейін бірден жаттығуларға ораламыз. Менің ойымша, біз демалуға лайық емеспіз. Сахнадағы орнымызды қайтарып, трофейлер үшін күресуіміз керек.»

«G2 Esports» ширек финалда «MOUZ» командасына 1:2 есебімен жол беріп, турнирде 5-8 орындарға ие болды. Команда 58 мың доллар жүлде ұтып алды, оның 40 мыңы ұйымға беріледі.