Формула-1-де V10 қозғалтқыштарының оралуы талқылануда

FIA президенті Мохаммед Бен Сулайемнің V10 қозғалтқыштарының ықтимал оралуы туралы әлеуметтік желідегі жазбасынан кейін автоспортта қызу пікірталас басталды.

FIA-ның ашық дөңгелекті жарыстар жөніндегі директоры Николас Томбазис Шанхайда федерация түрлі даму сценарийлерін зерттеп жатқанын растады. Солардың бірі — экологиялық отынмен жұмыс істейтін атмосфералық қозғалтқыштарды қайтару.

V10-ның оралуын қолдаушылардың қатарында қазіргі әлем чемпионы Макс Ферстаппен де бар. Ол мұндай қозғалтқыштардың «қазіргі жүйелерге қарағанда әлдеқайда қызықты» екенін атап өтті.

Алайда автокөлік өндірушілері бұл идеяға қарсы. Әсіресе, 2026 жылғы жаңа ережелер Формула-1-ге кіру шешімінде негізгі фактор болған «Audi» бұл мәселеде қатаң ұстанымда.

«2026 жылдан бастап жаңа гибридті қуат қондырғыларын қоса алғанда, ережелердегі өзгерістер біздің чемпионатқа кіруіміз үшін шешуші фактор болды», — делінген «Audi» мәлімдемесінде.

Ал «Cadillac» бұл ұсынысқа ашық қарайды. Америкалық компания V10 қозғалтқыштарына көшу чемпионатқа кіру кезінде тең жағдай жасауға мүмкіндік береді деп есептейді, өйткені олар қозғалтқышты бәсекелестерімен бір уақытта әзірлей алады.

FIA қазіргі жоспарларды өзгерту үшін өндірушілердің көпшілігінің қолдауына ие болуы керек. Алайда бұл екіталай, себебі 2026 жылғы жаңа қозғалтқыштарды әзірлеуге қазірдің өзінде үлкен инвестиция салынған.

Біздің парақшамыздан футбол матчтарының барлық нәтижелерін Live форматта бірінші болып біліңіз!