FIFA клубтық әлем чемпионатына бір миллиард доллардан астам қаражат бөледі

FIFA алдағы клубтық әлем чемпионатына қатысушыларға бұрын-соңды болмаған бір миллиард доллардан астам қаражат бөлмекші, деп хабарлайды BBC Sport.

Жаңа форматтағы ауқымды турнир 14 маусым мен 13 шілде аралығында АҚШ-та өтеді. Онда 32 клуб, оның ішінде 12 еуропалық команда, чемпиондық атақ үшін бақ сынайды.

Турнирдің қаржылық моделі DAZN стримингтік қызметімен жасалған эксклюзивті келісімшартқа негізделген. Қатысушы клубтар топтық кезеңге өткендері үшін негізгі төлемдер алады, ал турнирлік сатыда жоғарылаған сайын қосымша бонустар қарастырылған.

Еуропалық клубтар қауымдастығы (ECA) «Челси», «Манчестер Сити», «Бавария», «Боруссия» Дортмунд және «Пари Сен-Жермен» клубтарының мүдделерін қорғайды. Ал «Реал Мадрид» Суперлига жобасын қолдауына байланысты ECA құрамына кірмейді.

FIFA президенті Джанни Инфантино турнирдің жаһандық ауқымына ерекше назар аударды:
«FIFA жасайтын барлық нәрсе жаһандық сипатта болуы керек. Біз әлем бойынша барлығына мүмкіндік беруіміз керек, және клубтық әлем чемпионаты дәл осыны жасайды».

Африка құрлығынан турнирге «Әл-Ахли», «Видад», «Эсперанс» және «Мамелоди Сандаунз» клубтары қатысады. FIFA турнирден түскен барлық табысты әлемдегі клубтық футболды дамытуға қайта инвестициялайтынын атап өтті.