Фернандо Алонсо: «Сузука мен Монако — сенбіде керемет, жексенбіде қызықсыз»

Формула-1-дің екі дүркін чемпионы Фернандо Алонсо Сузука мен Монако Гран-приін салыстырып, бұл жарыстарда нәтиженің біліктілікке тәуелділігі тым жоғары екенін атап өтті.

Жақында өткен Жапония Гран-приінде поул-позициядан жарыс бастаған Макс Ферстаппен еш қиындықсыз жеңіске жетті. Бұл кезеңде басып озу әрекеттері өте аз болды — бұл жағдай Сузука трассасында соңғы жылдары жиі байқалуда.

«Бұл — Сузука, мұнда ауа райының әсерінсіз көп басып озулар болған жарысты есіме түсіре алмаймын. Бейсенбіде біз Сузука мен Монаконы мақтаймыз, ал жексенбіде жарыстардың қызықсыз екенін айтамыз. Формула-1-де Сузука сенбі күні, адреналин шарықтау шегіне жеткенде ғана керемет», — деді Алонсо.

«Ferrari» командасының басшысы Фредерик Вассер де бұл пікірді қолдады. Ол маусымның «біліктілік чемпионатына» айналу қаупі барын атап өтті. Себебі 2025 жылдың алғашқы төрт жарысында да жеңіс поул-позиция иесіне бұйырды.

Жалпы, 2024 жылы жарыс саны артқанына қарамастан, басып озу әрекеттері 70-ке азайған.

Формула-1 ұйымдастырушылары 2025 жылдан бастап Монакода міндетті екі пит-стоп енгізу арқылы жағдайды өзгертуге ниетті. Алайда Сузука трассасына қатысты нақты өзгерістер жоспарда жоқ.