«Челсидің» бұрынғы жұлдызы команданың прогресі туралы бапкердің сөзін қатты сынға алды

Daily Mail басылымының хабарлауынша, Джон Оби Микел «Челси» командасының дамуы туралы бас бапкердің соңғы мәлімдемесіне қатты реакция білдірді.

АПЛ турнир кестесінде алтыншы орынға жайғасқан «Челси» мен оның бас жаттықтырушысы Энцо Мареска бұған дейін клубтың белгіленген жоспардан озып келе жатқанын және Чемпиондар лигасына шығу үшін командаға екі жыл уақыт берілгенін мәлімдеген еді.

«Оған мұны кім айтты? Сіздер мені мазақ етіп тұрсыздар ма? Бұл – «Челси» футбол клубы! Қандай да бір жоспар туралы сөз қозғаудың өзі орынсыз. Оның Лестерден келгеніне ешқандай құрметсіздік жоқ, бірақ біз әрқашан Чемпиондар лигасы деңгейіндегі клуб болдық», – деді Микел өзінің The Obi One подкастында эмоциямен.

«Көктердің» бұрынғы жартылай қорғаушысы сонымен қатар Конференциялар лигасының матчтарын ешқашан көрмегенін айтып, бұл турнир лондондық клубтың мәртебесіне сәйкес келмейтінін атап өтті.