«Челси» Сэм Керрді Чемпиондар лигасының тізіміне қосты

Лондондық «Челси» Чемпиондар лигасының плей-офф кезеңіне арналған 25 ойыншының қатарына Сэм Керрді енгізді. Бұл туралы клубтың ресми сайты хабарлады.

31 жастағы австралиялық шабуылшы өткен жылдың қаңтарында жаттығу кезінде тізесінің крест тәрізді байламдарын жарақаттап алған еді. Қазіргі таңда ол қалпына келу кезеңінен өтуде. «Челсиде» өнер көрсеткен уақытында Керр 122 матчта 95 гол соғып, Әйелдер суперлигасының бес титулын жеңіп алды.

Команданың бас бапкері Соня Бомпастор ойыншының алаңға қашан оралатынын нақты айтқан жоқ:

«Әр спортшының қалпына келу уақыты әртүрлі — біреулерге 10 ай керек, ал басқаларына 13 немесе 14 ай қажет. Біз күн сайын оның алаңға тезірек шығуы үшін жұмыс істеп жатырмыз».

«Челси» Чемпиондар лигасының ширек финалында «Манчестер Ситимен» кездеседі. Алғашқы ойын 19 наурызда өтеді. Керрдің тізімге енуі американдық Миа Фишелдің тізімнен тыс қалуына себеп болды.

Клуб алдағы 12 күн ішінде төрт матч өткізеді, соның ішінде Лига кубогының финалы да бар.

15 жасында Австралия құрамасында дебют жасаған Керр «Алтын доп» сыйлығы үшін дауыс беруде екі рет үшінші орын алып, бір рет екінші орынға ие болған.