«Бавария» қақпашысы Мануэль Нойер жарақатына байланысты белгісіз мерзімге ойыннан тыс қалады

Чемпиондар лигасының «Байерге» қарсы матчында Мануэль Нойер оң аяғының балтыр бұлшық етін жарақаттап алды. Бұл туралы «Баварияның» медициналық штабы хабарлады.

Мюнхен клубының капитаны 59-шы минутта алаңнан кетуге мәжбүр болды. Оның орнына 21 жастағы дебютант Йонас Урбиг шықты, ол командаға 3:0 есебімен жеңіске жетуге көмектесті.

«Мануэль Нойердің оң балтыр бұлшық етінің талшықтары жыртылғаны анықталды. Ол белгісіз мерзімге ойыннан тыс қалады», — делінген клуб мәлімдемесінде.

Бұл ойын Нойер үшін Чемпиондар лигасындағы 150-ші матч болды. Ол турнир тарихында бұл межеге жеткен Криштиану Роналду (178 матч), Икер Касильяс (176 матч) және Лионель Месси (150 матч) қатарындағы төртінші ойыншы атанды. Сонымен қатар, неміс қақпашысы — турнирдегі барлық ойындарын негізгі құрамда бастаған жалғыз футболшы.

Мануэль Нойер «Бавария» құрамында 14 жыл ішінде 554 матч өткізді, ал ағымдағы маусымда оның еншісінде 33 ойын бар.