Әзірбайжан парадзюдо құрамасы Қазақстандағы әлем чемпионатына дайындалуда

Azerisport.com хабарлауынша, Әзірбайжан ерлер парадзюдо құрамасының бас бапкері Ибрагим Ибрагимов командасының Қазақстанда өтетін әлем чемпионатына дайындығы туралы айтты.

Мамыр айында өтетін біріншілікке команда толық көру қабілетінен айырылған екі спортшыны жіберуді жоспарлап отыр — Исмаил Мурадов (60 кг) және Закир Мислимов (90 кг). Ал екі дүркін паралимпиада чемпионы Ильхам Закиев қолына жасалатын отаға байланысты турнирге қатыса алмайды.

«Бізде болашағы зор жастар бар, бірақ олардың халықаралық жарыстарда тәжірибесі аз. Жақын арада бұл жігіттер де осындай турнирлерге қатысып, тәжірибе жинайды деп үміттенеміз. Ол үшін алдымен медициналық жіктеуден өтуі қажет», — деді Ибрагимов.

Әзірбайжан құрамасы қыркүйекте Тбилисиде өтетін Еуропа чемпионатына да толық құраммен қатысуды жоспарлап отыр.