Апоэлдің тәлімгері «Астанамен» тең түскеннен кейін төрешілікті сынады

Sports.kz мәліметінше, Кипрдің АПОЭЛ командасын жаттықтыратын Маноло Хименес Конференциялар лигасының топтық кезеңіндегі «Астанаға» қарсы матчтың нәтижесі туралы пікір білдірді. Ойын 1:1 есебімен тең аяқталды.

Кипр клубының бас бапкері төрешілер бригадасының жұмысына көңілі толмағанын ашық айтты. Ол ойын барысына әсер еткен бірнеше даулы сәттерді атап өтті:
«Біз алғашқы қателігіміз үшін жауап бердік. Бұл – факт. Бірақ төрешінің әділетсіз шешімдері де болды. Мысалы, Сатиастың алаңнан шығуының себебі маған түсініксіз. Сондай-ақ, біздің ойыншымызды қағып кеткен қақпашы қызыл карточка алмады. Бұл төрешінің екі қателігі, екеуі де АПОЭЛ-ге қарсы болды!»

Матчтың даулы нәтижесі мен төрешілікке деген наразылығына қарамастан, АПОЭЛ Конференциялар лигасының плей-офф кезеңіне жолдама алды. Ал «Астана» үшін бұл кездесу ағымдағы еурокубок маусымындағы соңғы ойын болды. Қазақстандық команда турнирдегі өнерін аяқтады.