Анастасия Волочкова: Камила Валиеваның ең басты медалі — көрермендердің мойындауы

«Матч ТВ» хабарлағандай, РФ-ның еңбек сіңірген әртісі Анастасия Волочкова мәнерлеп сырғанаушы Камила Валиеваның медальдарына қатысты пікірін айтты.

«Камила Валиеваның ең басты медалі — көпшіліктің және көрермендердің мойындауы. Бұл медальдарды тартып алғысы келетіндерге ұят. Менің шығармашылығымда бірінші және екінші бола алмайды, бұл — эстетика. Бірақ спорт — басқа нәрсе. Камила Валиева әрқашан бірінші болды және болады. Оның медальдары кеудесінде емес, тарихта. Ол қазірдің өзінде нағыз чемпион ретінде тарихқа енді», — деді Волочкова.

Айта кетейік, Спорттық төрелік сот (CAS) биыл спортшыға 2021 жылдың соңынан бастап есептелетін 4 жылдық дисквалификация тағайындады. Дисквалификация себебі — допинг сынамасынан триметазидиннің табылуы.

Нәтижесінде Валиева 2022 жылғы Олимпиада ойындарының командалық турниріндегі алтын медалінен және 2022 жылғы Еуропа чемпионатының алтын медалінен айырылды.