Ирландия футбол қауымдастығы (FAI) УЕФА-ға 17 жасқа дейінгі құрамалар арасындағы Еуропа чемпионатының іріктеу кезеңінде «Ирландия» мен «Польша» құрамалары арасында болған нәсілдік оқиғаға қатысты ресми өтініш жолдады. Бұл туралы BBC Sport хабарлады.
Оқиға ирландиялық команда 2:0 есебімен жеңіске жеткен матчтың екінші жартысында орын алды. Ойыншылар бұл туралы бірден бас бапкер Колин О’Брайенге хабарлап, ол төрешілер бригадасына үш рет жүгінді.
Матчтан кейін FAI өкілдері УЕФА делегатына қосымша баяндама жіберді. Делегат бұл оқиғаның қорытынды есепке енгізілгенін растады.
«FAI біздің ойыншыларымыз бен қызметкерлерімізге қатысты нәсілшілдіктің ешқандай түріне жол бермейді. Біз УЕФА-дан мұқият тергеу жүргізіп, тиісті шаралар қабылдауын күтеміз», — делінген қауымдастықтың мәлімдемесінде.
«Мен қауымдастықтың бұл оқиғаны УЕФА-ға жеткізу туралы шешімін толықтай қолдаймын және басшы органдардан қатаң тәртіптік шаралар күтемін», — деді О’Брайен.
Біздің парақшамыздан футбол матчтарының барлық нәтижелерін Live форматта бірінші болып біліңіз!
