Жуковскийдің командасы маусым жаңалығы болуы мүмкін – Нүркен Мырзағалиев «Тұран» – «Оқжетпес» матчы жайлы

Қазақстан премьер-лигасы қайта оралды! 2 наурызда 2025 жылғы маусымның алғашқы турында «Тұран» өз алаңында «Оқжетпесті» қабылдайды. Түркістандық клуб маусымды жеңіспен бастауға ниетті, ал көкшетаулық команда кез-келген қарсыласқа төтеп беруге дайын екенін дәлелдеуге тырысады.

Sport Pulse порталына футбол сарапшысы Нүркен Мырзағалиев қарсыластардың мүмкіндіктері туралы пікір айтты:

«Тұранның» болашағы ұзақ уақыт белгісіз еді: бас бапкер кім болады? бюджет пен құрам қандай болмақ? деген сұрақтар көп еді. Алайда қаңтардан бастап жағдай айқындала түсті. Клуб бірнеше мықты қазақстандық ойыншылармен келісімшарт жасасты, олардың қатарында Абылайхан Жұмабек бар. Сонымен қатар, «Қайсардың» ойыншылары болған – Йован Паевич, Василий Совпель, Руслан Юдинков және Горан Милойко команда сапына қосылды. Бұл футболшылар «Тұран» үшін маңызды рөл атқарады.

Әсіресе шабуылшы Лука Згурскийді ерекше атап өткен жөн. Ол Мәскеудің «ЦСКА» академиясының түлегі, әрі Өзбекстан чемпионатында өзін жақсы көрсетті. Ол жолдастық матчтарда-ақ гол соғып, өз әлеуетін көрсетті. Сонымен қатар, командаға тәжірибелі қақпашы Егор Хаткевич қосылды, ал бас бапкер қызметіне өткен маусымның үздік мамандарының бірі Виталий Жуковский тағайындалды. Ол «Атырауда» керемет жұмыс атқарып, мықты ұжым құрды. Енді бұл жетістігін «Тұранда» қайталауы мүмкін.

Ал «Оқжетпеске» келер болсақ, клуб үшін маусымаралық кезең қиын өтті. Алдымен оларға легионерлерді тіркеуге тыйым салынды, кейін рұқсат берілді, бірақ сапалы селекция жасауға уақыт тым аз болды. Құрамда тәжірибелі Аслан Дарабаев пен Тимур Досмағамбетов бар, алайда қорғаныс шебі күмән тудырады, себебі қорғаушылардың көбі өткен маусымда бірінші лигада ойнаған. Дегенмен, бас бапкер Андрей Ферапонтов айқын ойын философиясын қалыптастыруға тырысуда. Жаттығу жиындарында белгілі бір стиль байқалды, бірақ жолдастық кездесулер мен ресми матчтар – екі бөлек дүние.

Алдағы кездесуде «Тұран» алаң иесі ретінде және құрамның тұрақтылығы арқасында фаворит саналады. Егер Жуковскийдің командасы тез қарқын алып кетсе, олар маусымның басты жаңалықтарының бірі болуы мүмкін».

Матч қашан және қайда өтеді:

Стадион: «Түркістан Арена», Түркістан

Басталуы: 16:00

Тікелей көрсетілім: KFF League YouTube-арнасы

Басты сурет: «Тұран» ФК