Жоқшылықтан жаһандық жарыққа: ТОП-5 кедей отбасыдан шыққан спортшылар

Спорт — өмірдің кез келген қиыншылығын жеңіп шығуға болатынын дәлелдейтін күшті құрал. Әсіресе, жекпе-жек өнерінде өмір жолы күрделі, тағдыры ауыр, алайда қайсар мінезінің арқасында әлемге танылған спортшылар көп. Бұл мақалада біз кедейліктен шығып, табандылықпен, терімен, қанымен, ең бастысы жүрегімен чемпион атанған бес файтердің өмір жолын баяндаймыз. Олар бүгінгі күннің шынайы батырлары.

1. Мэнни Пакьяо (Филиппин) 

Мэнни Пакьяо — әлемнің сегіз салмақ дәрежесінде чемпион атанған тұңғыш және жалғыз боксшы. Оның балалық шағы аштықпен, жоқшылықпен өтті. Филиппиннің Кибао қаласында туған Пакьяо анасы мен бауырларын асырау үшін 14 жасында мектепті тастап, көшеде тоқаш, су сата бастады.

Бірақ бокспен айналысуға деген құштарлығы оны құтқарды. Ол өз бетімен жаттығып, соңында ұлттық құраманың көзіне ілікті. Кейін әлемнің үздік промоутерлерінің бірі Фредди Роучпен жұмыс істеп, бүкіл әлемге аты танылды. Бүгінде Пакьяо — тек рингте ғана емес, саясат пен қайырымдылықта да аты озық тұлға.

2. Фрэнсис Нганну (Камерун)

Фрэнсис Нганну — UFC-дің бұрынғы ауыр салмақтағы чемпионы. Оның балалық шағы Африканың кедей елдерінің бірі — Камерунда, қолмен жұмыс істейтін қарапайым ауылда өтті. Ол 10 жасынан бастап құм карьерінде жұмыс істеп, ауыр еңбекке жегілді.

Нганну үлкен арманмен 26 жасында Францияға жаяу жолға шықты. Ол еліне заңсыз жолмен келіп, бірнеше айды баспанасыз, тамақсыз өткізді. Бірақ жаттығуды тастамады. Парижде ол алғаш рет ММА клубқа түсіп, жаттыға бастады. UFC-де алғашқы жылдары қарсыластарына жол беріп жүрсе де, кейін әлем чемпионы атанды. Оның нокауттары мен қайсарлығы бүгінде миллиондаған жанкүйерді тәнті етеді.

3. Конор МакГрегор (Ирландия) 

Бүгінгі таңда Конор МакГрегор — спорттағы ең табысты тұлғалардың бірі. Бірақ оның да жолы оңай болған жоқ. Ол Дублиннің жұмысшы аудандарында өсті. Жас кезінде сантехник болып жұмыс істеп, үкіметтің әлеуметтік жәрдемақысын алып күнелтті.

2013 жылы UFC-дегі дебютінен бұрын оның қалтасында 200 еуро ғана болғаны жиі айтылады. Алайда оның шоуға бейімділігі, ерекше сөйлеу мәнері және қарсыластарды мазақтау қабілеті оны тез танымал етті. Чемпиондық белбеу, атақ-даңқ, бизнес — барлығы оған арман мен еңбектің арқасында келді.

4. Деонтей Уайлдер (АҚШ)

Уайлдердің спорттағы жолы кездейсоқ басталған. Ол жас кезінде колледжге түсе алмай, түрлі жұмыс істеді. 19 жасында оның қызы ауыр дертпен дүниеге келіп, отбасын асырау үшін ол боксқа бет бұрады.

Тек 20 жасында қолғап киген Уайлдер қысқа уақыт ішінде АҚШ чемпионатына қатысып, 2008 жылы Бейжің Олимпиадасында қола медаль алды. Кейін кәсіпқой бокста аты шулы нокаутшыға айналып, WBC тұжырымы бойынша ауыр салмақтағы әлем чемпионы атанды. Ол — ауыр балалықтың, әкелік жауапкершіліктің және шексіз еңбекқорлықтың символы.

5. Майк Тайсон (АҚШ)

Майк Тайсон – кәсіпқой бокста аты аңызға айналған тұлға. Ол Бруклиннің ең қауіпті аудандарының бірінде, кедейлік пен қылмыс жайлаған ортада өсті. Балалық шағы қиындық пен жоқшылықта өтті. Әкесі тастап кеткен, анасы жалғыз өзі үш баласын асырауға тырысты. Майк бала кезінен ұрлық жасап, бірнеше рет жасөспірімдер колониясында болған.

Бірақ бокспен шындап айналыса бастаған соң, өмірі түбегейлі өзгерді. Ол небәрі 20 жасында әлем чемпионы атанып, тарихтағы ең жас ауыр салмақты бокс чемпионы болды.

Бұл бес спортшы — жоқшылықтан жұлдызға дейінгі жолды жүріп өткен қайсар тұлғалар. Олар үшін кедейлік — кедергі емес, керісінше, үлкен шабыт көзіне айналды. Олар қанша қиын болса да, арман мен еңбек алда тосқан кез келген кедергіні жеңе алатынын дәлелдеді.