Жібек Құламбаева W100 турнирінің чемпионы атанды

Қазақстандық теннисші Жібек Құламбаева италиялық әріптесі Николь Фосса Уэргомен бірге Мадридте өткен W100 санатындағы турнирдің жұптық сайысында жеңімпаз атанды.

Финалда қазақстандық-италиялық жұп испаниялық Марина Бассольс пен Андреа Ласаро Гарсияны тізе бүктірді. Бірінші сет тай-брейкте испан теннисшілерінің пайдасына аяқталды — 7:6 (9:7). Екінші сетте Жібек пен Николь есепті теңестіріп, өз пайдасына шешті — 7:6 (7:4). Чемпиондық тай-брейкте Құламбаева мен Уэрго қарсыластарына мүмкіндік бермей, 10:4 есебімен басым түсті.

Бұл — Жібек пен Никольдің бірге жеңіп алған бесінші титулы, биылғы маусымдағы алғашқы және W100 санатындағы алғашқы жеңісі.