«Жетісу» волейбол клубы Азия чемпиондар лигасының ширек финалына жолдама алды

Филиппинде өтіп жатқан волейболдан Азия чемпиондар лигасында қазақстандық «Жетісу» клубы ширек финалға шықты.

А тобының екінші кездесуінде Марко Гршичтің шәкірттері иорданиялық «Al Nasser» командасын сенімді түрде жеңіп, топтағы екінші жеңісіне қол жеткізді. Бұған дейін «Жетісу» алғашқы ойында турнир иесі — филиппиндік «Creamline Cool Smashers» клубын ұтқан болатын.

Ширек финалда отандастарымыз тағы бір филиппиндік ұжым — «PLDT High Speed Hitters» командасымен кездеседі.

Барлық матчтарды «Qazsport» телеарнасы тікелей эфирде көрсетеді.