Жереми Фримпонг «Ливерпульдің» жаздағы алғашқы трансфері болуы мүмкін

Инсайдерлік ақпаратқа сәйкес, «Ливерпуль» клубы «Байер» қорғаушысы Жереми Фримпонгты жазғы трансфер терезесінде сатып алуға жақын. 24 жастағы футболшының трансферлік құны — 35 миллион еуро, мерсисайдтық клуб бұл соманы төлеуге дайын.

Фримпонгтың ауысуы команданың жаңа бас бапкері Арне Слоттың бастамасымен жүзеге асырылмақ. Ол қорғаушыны Трент Александер-Арнольдтың орнына негізгі ойыншы ретінде қарастырып отыр. Айта кетейік, Александер-Арнольдтің жазда «Реал Мадридке» ауысуы күтілуде.

Трансфер төлемінің бір бөлігі футболшының бұрынғы клубы — шотландиялық «Селтикке» тиесілі болады. Келісімшартта келесі сатылымнан пайыз алу туралы шарт бар.

Фримпонг өткен маусымда «Байер» құрамында Бундеслига чемпионы атанып, өзінің әмбебап ойынымен көзге түсті.