Жеңілмеген қазақстандық жауынгер Саят Абдуали Ташкенттегі жеңісі туралы айтты

Жеңілмеген қазақстандық жауынгер Саят Абдуали (8-0) Ташкенттегі Octagon 72 турнирінде кезекті жеңісіне қол жеткізді — ол өзбекстандық спортшы Хұсанбой Атабаевпен өткен жекпе-жекті екінші раундта мерзімінен бұрын аяқтады.

Жетісай қаласының тумасы спорттағы жолын футболдан бастаған, бірақ 16 жасында ММА-ны таңдады — бұл шешім оның болашақ мансабын айқындады. «Аватар» лақап атын жауынгер октагондағы әмбебаптығы үшін жаттықтырушысынан алған.

«Мен басқаларға қарағанда жан-жақты дамыған жауынгермін деп айта аламын. Күрес, бокс, муай-тай, грэпплинг — бәрі жақсы дамыған», — деді Абдуали.

Спортшыны жиі Шавкат Рахмоновпен салыстырады, алайда ол өзінің жекпе-жек стилінің ерекшелігін атап өтеді. Жауынгердің басты мақсаты — UFC-ге түсіп қана қоймай, чемпиондық белбеуді жеңіп алу. Абдуалидің жауынгер ретінде қалыптасуына Конор Макгрегор үлкен әсер еткен.