«Жекпе-жектер — менің жұмысым болса екен деймін» — Евгений Риб алғашқы белбеуі, чемпиондыққа жол және титулын қорғау туралы

Өскемен тумасы Евгений Риб 93+ келі салмақ дәрежесінде ARB Semey лигасының чемпионы атанды. Ол екі жекпе-жекте де сенімді жеңіске жетті: бірін — ұпаймен, екіншісін — бірінші раундта мерзімінен бұрын аяқтады. Бұл оның мансабындағы алғашқы белбеу. Енді 20-шы шілдеде Евгений чемпиондық атағын қорғайды.

Sport Pulse порталына берген эксклюзивті сұхбатында ол жеңістен алған әсерімен, чемпиондыққа апарар жолдағы қиындықтармен, мотивациясымен және алдағы мақсаттарымен бөлісті.

Жеңіс пен сезім

— Евгений, алғашқы белбеу құтты болсын! Чемпион болған сәтте қандай сезімде болдың?

— Әрине, қуандым. Жеңіс — әрдайым жағымды. Ал белбеу — керемет естелік.

— Көптеген спортшылар жеңісті бірден сезінбейтінін айтады. Сенде қалай болды?

— Мен бірден сезіндім. Бәрі анық болды.

— Бұл белбеу сен үшін нені білдіреді? Жеңістің белгісі ме, еңбектің жемісі ме, әлде үлкен жолдың бастамасы ма?

— Бұл — үлкен жолдың бастамасы. Солай боларына үміттімін.

Белбеуге апарар жол

— Барлығы қалай басталды? Жекпе-жекпен айналысқың келгенін алғаш қашан түсіндің?

— Барлығы колледжден басталды. Сол кезде қызығушылық пайда болды.

— Бәрін тастап кеткің келген сәттер болды ма? Қиындықты қалай еңсердің?

— Ондай сәттер болды, тастап кеткен кездер де болды. Басқа істермен айналысып көрдім. Бірақ бәрібір жекпе-жек әлемі өзіне тартты.

— Чемпиондыққа жету жолында ең қиын не болды?

— Ең қиыны — дайындық. Дайындық көп күш алады.

Белбеуді қорғау

— 20-шы шілдеде алғаш рет чемпиондық атағыңды қорғайсын. Жекпе-жекке дайындық қалай өтуде?

— Физикалық және моральдық тұрғыдан дайындалып жатырмын.

— Толқу бар ма? Әлде толықтай жекпе-жек режиміне өттің бе?

— Әзірге толқу жоқ.

— Қарсыласың жайлы не айта аласың? Қаншалықты қауіпті деп ойлайсың?

— Нақты ештеңе айта алмаймын, бірақ барлығына бірдей байыппен қараймын.

Жеке өмір

— Сені рингке шығуға не итермелейді?

— Жекпе-жектер менің жұмысым болса екен деген арманым — басты мотивациям.

— Спорт залдан тыс уақытыңды қалай өткізесің?

— Жұмыс пен жаттығуды қатар алып жүремін.

— Саған кім қолдау көрсетті? Кімге ерекше алғыс айтқың келеді?

— Ең үлкен қолдау көрсеткен — әйелім. Соған ерекше ризамын.

Болашаққа көзқарас

— Белбеуді қорғау арқылы нені дәлелдегің келеді?

— Әзірге бәрін тек өзіме дәлелдеп жүрмін.

— Алдағы бір жылға қойған мақсатың қандай? Өзге лигаларда өнер көрсету жоспарда бар ма?

— Жоғары деңгейге көтерілуді қалаймын. Мақсат бар, тоқтау ойда жоқ.

— Жанкүйерлер сені қалай есте сақтағанын қалар едің?

— Көрермен мені қарапайым, ниеті түзу спортшы ретінде қабылдаса деймін.