«Жайық» клубы көш басындағы «Жетісуды» ұтты

Атырау қаласында волейболдан ерлердің ұлттық лига командалары арасында өтіп жатқан ХХХIV Қазақстан чемпионатының екінші турында Оралдың «Жайығы» мен талдықорғандық «Жетісу» өзара шеберлік байқасты, деп хабарлайды Prosports.kz сайты ҚазАқпаратқа сілтеме жасап.

Алғашқы ойынында «Ұшқын-Көкшетауға» жол берген талдықорғандықтар (бас бапкері Марат Адрышев) содан бері 11 матч бойы жеңілмей келе жатқан-ды.

Ал биыл чемпион атанған оралдықтар күзде басталған жаңа маусымда қарқынын бәсеңдетіп, «Жетісумен» қатар «Ақтөбе» мен «Атырауға» да есе жіберген болатын.

Бұл жолы бірінші партияда «Жетісу» 25:22 есебімен басымдылық танытты. Дегенмен бұдан кейін Виктор Козиктің шәкірттері ойын тізгінін қолына алып, камбэк жасай алды – 25:23, 26:24, 25:19. Қорытынды есеп – 3:1, «Жайықтың» пайдасында.

Осылайша, «Жетісу» клубының жолына тосқауыл қойған «Жайық» ұпай санын 28-ге жеткізді. Талдықорғандықтар 33 ұпаймен әзірге бірінші орында қалды. Бірақ оларды ақтөбеліктер (32 ұпай) өкшелеп тұр.