Жәнібек Әлімханұлы Эрисланди Ларамен біріктіру жекпе-жегін өткізуге дайын

Жәнібек Әлімханұлы (17-0, 12 КО) — орта салмақта WBO және IBF нұсқалары бойынша әлем чемпионы — WBA белбеуінің иегері кубалық Эрисланди Ларамен (31-3-3, 19 КО) жекпе-жек өткізуге дайын екенін білдірді.

X әлеуметтік желісінде қазақстандық боксшы мен жанкүйер Марко Кобельт арасында қысқа диалог өрбіді:

«Ларамен жұдырықтасасың ба?»
«Егер ол келіссе, еш мәселе жоқ», — деп жауап берді Әлімханұлы.

42 жастағы кубалық боксшы өткен жылдан бері рингке шыққан жоқ — оның соңғы жекпе-жегі американдық Дэнни Гарсиямен (37-4, 21 КО) өтті, онда Лара мерзімінен бұрын жеңіске жетті.

«Қазақ стилі» бұған дейін орта салмақтағы төрт негізгі титулды біріктіру ниетін растаған болатын.