Усман Нурмагомедов ағасы Хабибтің командасына не үшін қосылмағанын түсіндірді

Мансабында мүлдем жеңіліп көрмеген аралас жекпе-жек шебері – жеңіл салмақта Bellator чемпионы Усман Нурмагомедов жақын күндері болатын жекпе-жегіне дайындықты қызу жүргізіп жатыр, — деп хабарлайды Бірінші бол. Дегенмен, ол немере ағасы Хабибпен бір командада жаттығып жатқан жоқ.

Бұл күндері UFC-дің экс-чемпионы әйгілі Хабиб Нурмагомедов Лос-Анджелесте оқу-жаттығу жиынын өткізіп жатыр. Оның командасында Шавкат Рахмоновтың келесі қарсыласы – әлем чемпионы Белал Мухаммад та бар.

«Бастапқыда менде аздап визамен проблема болды. Кейіннен виза алдым, дегенмен кештеу болды, сондықтан Америкаға бармау туралы шешім қабылдадым. Егер мен ол жаққа барғанда, онда уақыт белдеуіне үйренуіме тура келуші еді. Он күн жоғалтып алар едім. Сол үшін Дағыстанда қалып жаттығу жасау туралы шешім қабылдадым. Себебі мұнда да төбелесетін жауынгерлер өте көп», — деді Усман MMA Junkie-ге берген сұхбатында.

25 қаңтарда Усман Нурмагомедов Bellator-да ирландиялық Пол Хьюзбен айқасады. Кездесу Дубайда өтеді.