Ұлттар лигасының финалында жанкүйер қайғылы қазаға ұшырады

Мюнхеннің «Альянц Арена» стадионында Испания мен Португалия құрамалары арасындағы Ұлттар лигасының финалы кезінде қайғылы оқиға орын алды — Гармиш-Партенкирхен ауданының тұрғыны трибунаның орта қабатынан құлап кетті.

Ер адам алдымен төменгі қабатқа, содан кейін медиа-аймақтағы баспалдаққа құлап — алған жарақаттарынан оқиға орнында қайтыс болды. Тергеуді бастаған Мюнхен полициясы оқиғаның қылмыстық сипаты жоқ екенін мәлімдеді.

«Медициналық бригаданың барлық күш-жігеріне қарамастан, зардап шегуші өкінішке орай, 00:06-да қайтыс болды. Біздің ойымыз осы қиын сәтте оның жақындарымен бірге», — делінген УЕФА мәлімдемесінде.

«Жанкүйердің қазасына байланысты терең көңіл айтқым келеді. Бұл бізге өмірде шынымен маңызды нәрсені еске салады», — деді Испания құрамасының бас бапкері Луис де ла Фуэнте.

Негізгі уақыттағы 2:2 есебінен кейін пенальти сериясында Португалия құрамасы 5:3 есебімен жеңіске жетті. Португалдықтардың бапкері Роберто Мартинес болған жағдайды «өте қайғылы жаңалық» деп атады, ал құрама өкілі бұл қайғылы оқиға «олардың жеңісіне көлеңке түсірді» деп қосты.