УЕФА 2026 жылғы футзал Еуропа чемпионатын басқа елге көшіруді қарастыруда

«Футзал Қазақстан» мәліметінше, УЕФА 2026 жылғы футзалдан Еуропа чемпионатын басқа елге көшіру нұсқаларын қарастырып жатыр. Себебі бастапқы ұйымдастырушылар — Латвия мен Литва турнирді өткізуден бас тартты.

Мәселенің басты себебі — аталмыш елдердің Беларусь құрамасын өз аумағына жіберуден бас тартуы. Беларусь 2026 жылғы Еуроның финалдық кезеңіне алғаш рет жолдама алған, алайда оның Ресей-Украина қақтығысындағы саяси ұстанымы қабылдаушы тараптарға әсер еткен.

Қазіргі жағдай плей-офф жеребесінің уақытында өтуіне де қауіп төндіруде. Жеребе 21 мамырға жоспарланған, бірақ кейінге шегерілуі мүмкін.

Турнирді қабылдауға үміткер елдердің бірі — Қазақстан. Елде халықаралық деңгейдегі жарыстарды өткізуге толық инфрақұрылым мен тәжірибе бар.