Тоттенхэм Жапонияның жас қорғаушысымен келісімшартқа отырды

Лондондық «Тоттенхэм» Жапония құрамасының қорғаушысы Кота Такаиді «Кавасаки Фронтале» клубынан 5 миллион фунт стерлингке сатып алғанын жариялады.

20 жастағы футболшы ағылшын клубымен 2030 жылдың жазына дейін бес жылдық келісімшартқа қол қойды — ол Томас Франктің басшылығындағы негізгі құрамға қосылады.

Такаи Жапония ұлттық құрамасы сапында әлем чемпионатының іріктеу кезеңінде Қытайға қарсы ойында дебют жасап, содан бері ел құрамасы үшін төрт кездесу өткізді. Өткен жылы қорғаушы «Кавасаки Фронталенің» Жапония Суперкубогын жеңіп алуына көмектесіп, елдің үздік жас ойыншысы атанды.

Жапон футболшысы «шпорлардың» үшінші жазғы трансфері болды — бұған дейін клуб жалға алынған қорғаушы Кевин Данзо мен шабуылшы Матис Тельдің келісімшарттарын сатып алған болатын.