«Торонто» мен Таварес жаңа келісімшарт бойынша келісе алмай отыр

The Fourth Period мәліметі бойынша, Джон Таварес пен «Торонто Мэйпл Лифс» — жаңа келісімшартқа қол қоюдан алыс тұр.

«Тараптар мәмілеге мүлдем жақын емес. Мұндай ұсыныстар іске көмектеспейді. Оқиғалардың қалай өрбитінін көреміз», — деді инсайдер Дэвид Паньотта.

«Үйеңкі жапырақтары» капитанының қазіргі келісімшарты бойынша маусымына 11 миллион доллар алады — келісімшарт осы жазда аяқталады. Клуб 34 жастағы шабуылшыға маусымына 4 миллионнан кем үш жылдық келісім ұсынды, ал ойыншы 5 миллионнан астам сомаға үміттеніп отыр.

2018 жылдан бері «Торонто» сапында өнер көрсетіп келе жатқан шабуылшы аяқталған маусымда — тұрақты біріншілікте 74 ұпай және плей-оффта 7 ұпай жинады.