Томас Франк Тоттенхэмге тағайындалуы туралы алғаш рет пікір білдірді

«Тоттенхэмнің» жаңа бас бапкері Томас Франк маусымда тағайындалғаннан кейін алғашқы баспасөз мәслихатын өткізді — маман соңғы төрт жылда клуб төрт бапкерді ауыстырғанына қарамастан, қиындықтардан қорықпайтынын жеткізді.

«Маған клубтың амбициялары ұнайды және менің барлық шешімдерім ұзақ мерзімді келешекке бағытталған. Әңгіме 18 ай шыдау туралы емес — бұл ұзақ мерзімді жұмыс», — деді 51 жастағы дат маманы.

Франк өткен маусымда команданың Еуропа Лигасындағы жеңісін оң бағалап, басты мақсатын — клубтың барлық турнирлерде тұрақты өнер көрсетуін қамтамасыз етуді белгіледі. Маман сондай-ақ Премьер-лигада жұмыс ұзақтығы бойынша екінші орында болған «Брентфордтан» кетуі туралы пікір білдірді.

«Бір жағынан, шешім өте қиын болды, екінші жағынан — өте оңай болды. «Тоттенхэм» масштабындағы клуб есігіңді қаққанда, бас тарту мүмкін емес», — деді Франк.

Бапкер Сауд Арабиясының клубтары қызығушылық танытып отырған капитан Сон Хын Мин мен Кристиан Ромероның болашағы туралы тікелей пікір білдіруден бас тартып, екеуін де команда үшін «өте маңызды ойыншылар» деп атады.