Тастанбек Есентаев легионерлерге тыйым салу туралы заң жобасын қолдады

«Астана» футбол клубының бұрынғы бас директоры Тастанбек Есентаев легионерлерді қаржыландыруға тыйым салатын жаңа заң жобасына қатысты пікір білдірді, деп хабарлайды Sports24.kz.

Маманның айтуынша, бұл бастама Қазақстан Премьер-лигасы клубтарын бәсекелі ортаға бейімдейді:

«Футбол клубтары бюджет пен квазимемлекеттік қаражат есебінен қаржыландырылып келді, ал олар ақшаны қалай болса солай жұмсады. Енді олар табыс табу жолын ойлануға мәжбүр болады. Әрбір менеджер, директор шетелдік тәжірибені зерттейтін болады. Енді оларда акционерлік қоғамдар, жекеменшік клубтар мен жұмыс істейтін биржалар секілді тәсілдерді қарастыру қажеттілігі туындайды», — деді Есентаев.

Ол сондай-ақ шетелдік футболшылардың елімізге спорттық мақсатпен емес, тек ақша табу үшін келетінін атап өтті:

«Олар мұнда ақша табуға келеді. Ал бізде үлкен футболшыға айнала алатын дарынды балалар өте көп», — деді ол.

Еске салайық, 26 наурызда ҚР Парламенті Сенатының депутаттары «Дене шынықтыру және спорт туралы» заңға түзетулерді қабылдады. Енді ел азаматтары болып саналмайтын спортшыларға бюджет есебінен қаржы бөлуге тыйым салынады. Вице-министр Серік Жарасбаев үнемделген қаржы бұқаралық және балалар-жасөспірімдер спортына бағытталатынын айтты.

Тастанбек Есентаев 2021-2023 жылдар аралығында «Астана» клубының бас директоры қызметін атқарды. Оның басшылығымен команда 2022 жылғы маусымда ел чемпионы атанды.

Біздің парақшамыздан футбол матчтарының барлық нәтижелерін Live форматта бірінші болып біліңіз!