Сон Хын Мин MLS-ке рекордтық сомаға ауысты

BBC Sport мәліметінше, Сон Хын Мин MLS тарихындағы рекордтық сома — 20 миллион фунт стерлингтен астам қаражатқа «Лос-Анджелеске» ауысты.

33 жастағы оңтүстік кореялық футболшы екі жылдық келісімшартқа қол қойды, оны тағы екі маусымға ұзарту мүмкіндігі бар. «Лос-Анджелес — арман қала. Мойындаймын, бұл клуб менің бірінші таңдауым емес еді, бірақ клуб президентімен әңгіме менің көзқарасымды өзгертті», — деді Сон баспасөз мәслихатында.

«Мен Лос-Анджелеске трофейлер жеңіп алу үшін және осы клубқа, қалаға және жанкүйерлерге бар күшімді беру үшін келдім», — деді футболшы.

«Лос-Анджелесте» Сон «Тоттенхэмдегі» бұрынғы серіктесі Уго Льориспен қайта қауышады. Ағылшын клубында өткізген он жыл ішінде кореялық футболшы 454 ойында 173 гол соғып, команда капитаны ретінде Еуропа лигасының жеңімпазы атанды.

«Сонни — біздің клуб формасын киген ең үздік ойыншылардың бірі. Ол тек дарынды футболшы ғана емес, сонымен қатар бүкіл әлем бойынша адамдарға шабыт берген керемет тұлға», — деді «Тоттенхэм» төрағасы Дэниел Леви.