Шымкенттен ұлттық құрамаға дейін: «Оңтүстік» футбол академиясы болашақ футболшыларды тәрбиелеуде

«Оңтүстік» футбол академиясының директоры Бақдәулет Қожабаев клубтың бір жыл ішіндегі жетістіктері мен алдағы жоспарларымен бөлісті. Ол академиядағы 250 баланың спорттық киімдермен қамтамасыз етілгені, қаржылық тұрақтылықтың жақсарғаны және команданың екінші лигада үшінші орынды иеленуі туралы әңгімеледі. Сондай-ақ, Бақдәулет мырза алдағы 5 жылда «Ордабасы» құрамында жергілікті балалардың ойнайтынына сенім білдіріп, академияның басты мақсаты — ұлттық құраманы жас таланттармен толықтыру екенін атап өтті.

Бақдәулет мырза, «Оңтүстіктің» директоры қызметіне келгеніңізге бір жыл өтіпті. Осы уақыт аралығында қандай жұмыс атқардыңыз?

Осы жылды бізді ұйымдастырушылық мәселелерге ден қою жылы деп атадық. Академиямызда 250 бала бар. Олардан басқа, екінші лигадан бастап, 2013 жылғы балаларға дейін командаларымызда толықтырылды. Ерлер командасында 24-25 ойыншы, жаттықтырушылар және әкімшілік қызметкерлерден құралған үлкен құрамымыз бар. Биыл «Оңтүстік» футбол академиясында 100-ге жуық адам жұмыс істеді.

Бірінші кезекте балаларға қажетті киіммен қамтамасыз ету мәселесін шештік. 250 балаға, 60-қа жуық қызметкерге Joma спорттық киімдерін бердік. Сонымен қатар, ойын формаларын жаңарттық, доптар мен инвентарьларды толықтырдық.

Өзіңіз осы оңтүстіктің тумасысыз. Футболшы мансабыңызды аяқтаған соң «Оқжетпесте» қызмет еттіңіз. Биыл «Оңтүстікті» басқарып жатырсыз. Туған қалаңыздың командасында жұмыс істеуге қандай мотивация бар?

Туған еліме адал қызмет ету. Биыл 250 балаға жағдай жасап, ешқандай қысым көрмей, олардың спорттық өмірін жақсартуға тырыстық. Балалардың ішінен екінші лигаға шақырылған 2008 жылы туған шәкірттеріміз стипендия алды. Екінші лигада үшінші орынды иелендік, бұл жаман нәтиже емес. Алдағы маусымға біз нәтижеге бағытталған жұмыс жасаймыз деп үміттенеміз.

Футбол туралы сөйлесейік. Клубтың даму векторы қандай? Неге баса назар аударасыз?

Бізді шабыттандыратын — балаларымыз, талантты шәкірттеріміз, Шымкенттегі «Ордабасы» академиясындағы өрендеріміз. Академиямыздың Оңтүстігінде таланты көп. Құдай қаласа, осы балаларымыз 4-5 жылда «Ордабасы» командасының құрамын толықтырып, өздері ойнайтын болады.

Екінші лига маусымы аяқталып, «Оңтүстік» өз конференциясында үшінші орынға тұрақтады. Маусым басында қойылған мақсат орындалды ма?

Екінші лигада үшінші орынды иелендік, бұл жаман нәтиже емес. Алдағы маусымға біз нәтижеге бағытталған жұмыс жасаймыз деп үміттенеміз.

Алдағы маусымға жоспар қандай?

Жақсы жетістіктерге жету үшін жұмысымызды жалғастырамыз. Шет елдерге барып, халықаралық жарыстарға қатысып, тәжірибе жинаймыз. Сербия мен Хорватияға барып, жақсы жарыстарға қатысып, балаларымыздың деңгейін көтеру үшін көп еңбектенеміз. Алдымызға мақсаттар қойдық, оның нәтижесін алдағы уақытта көре жатармыз.

Бұған дейін «Оңтүстік» клубында қаржылық қиындықтар жиі болатынын құлағымыз шалып қалатын. Биыл клубта қаржылық қиындық болды ма? Клубтың бюджетін қандай?

Өткен жылы қаржылық қиындықтар мен қарыздар болды, бірақ биыл барлығын ретке келтіріп, қаржылық қиындықтарды жеңе алдық деп айтуға болады. Осы жылы ешқандай қиындық болған жоқ. Жаттықтырушылар мен қызметкерлер уақытында жалақыларын алып отырды. Шымкент қаласының спорт басқармасына және әкімдікке алғысымды білдіремін.

«Оңтүстік» командасының серіктестері бар ма? Қандай клубтармен тығыз қарым-қатынастасыздар?

Осы жылы демеушілер тауып, спорттық тағамдар, спорттық дүкендер арқылы балаларды дәрумендермен қамтамасыз еттік. Әр ойыннан кейін, жергілікті пиццериялар балаларымызға пицца ұсынды. Кәсіби футбол клубтарындағыдай, ойыннан кейін балаларымыз пицца жеп, спорттық тамақтану арқылы қалпына келуде. Жергілікті кәсіпкерлерге қолдау көрсеткендері үшін алғысымды білдіремін.

Клубтың болашағын 5 жылдан кейін қалай елестетесіз?

Құдай қаласа, 5 жыл ішінде өзіміздің Шымкенттің жергілікті талантты балаларынан ұлттық құрамада өнер көрсететін ойыншылар шығады деген үмітіміз бар. Жергілікті «Ордабасы» командасын өз балаларымыздың ойынымен толтырып, нәтижелерін көрсету біздің басты мақсатымыз. «Ордабасы» командасының көшбасшы ойыншыларын дайындау мақсатымыз.
Біз Шымкент қаласының жергілікті балаларынан үлкен үміт күтеміз. Сол балалармен жүйелі жұмыс істеп, ұдайы қолдау көрсетіп, олар ұлттық құрамада өнер көрсетсе, бұл біздің еңбегіміздің жемісі, үлкен арманымыз болар еді.