«Шахтер» жаңа логотипін таныстырды

Қарағандының «Шахтер» футбол клубы өз логотипін жаңартты. Бұл туралы команданың ресми Instagram парақшасы хабарлады.

«Сіз күттіңіз бе? Біз жариялаймыз! Біз клуб тарихын жаңаша жазып, жаңа логотипті ұсынамыз!» – деп жазды клуб өкілдері.

Жаңа эмблеманы жасау барысында өңірдің ерекшеліктері мен дәстүрлері ескерілген. Логотиптің негізгі элементі – Қарағандының символына айналған террикондарды бейнелейтін стильдендірілген геральдикалық қалқан. Қалқанның ортасында 1958 жылғы тарихи футбол добы орналасқан, оны «Football Club» және «Qaragandy» жазулары қоршап тұр. Доптың артында тау-кен ісінің белгісі саналатын екі айқасқан қайла бейнеленген. Сонымен қатар, клуб түстеріндегі классикалық тік жолақтар және олардың үстінде «Шахтер» атауы орналастырылған.

«Бұл логотип – жай ғана жаңарту емес. Бұл – біздің өткеніміз, бүгініміз және болашағымыздың бір белгіде тоғысуы», – деп атап өтті клуб өкілдері.

Жаңа логотипті әзірлеу байқауының жеңімпазы – @adil_kais есімді дизайнер.

Қарағандылық «Шахтер» – Қазақстанның ең танымал және тарихы терең футбол клубтарының бірі. Жаңартылған логотип жанкүйерлердің көңілінен шығып, клубтың жаңа белестерді бағындыруына серпін береді деп сенеміз.