Сапарбай Айдаров: Ұзақ уақыттан кейін рингке оралу және Биволмен спарринг

Спорт Пульс редакциясы бокстан Қазақстанның бірнеше дүркін чемпионы, Азия ойындарының жүлдегері, “Astana Arlans” командасының WSB нұсқасы бойынша чемпионы Сапарбай Айдаровпен сұхбаттасты. Сұхбат барысында Сапарбай бізге соңғы өткен жекпе-жегі туралы, Биволмен достығы және алдағы жоспарлары туралы айтып берді.

Соңғы Пучетаға қарсы өткен жекпе-жек туралы айтып өтсең? Қаншалықты ауыр немесе жеңіл айқас болды? 

Қарсыласым Эмелина Пучета бойы аласа, бірақ физикалық тұрғыдан өте мықты боксшы. Біз оны жекпе-жекке дейін жақсылап зерттедік. Жақын қашықтықта жақсы жұмыс жасайды екен. Сол үшін бізге арақашықтықта көп жұмыс жасау керек болды. Меніңше бәрі ойдағыдай өтті. Бір мәрте іштен ұрып, нокдаунға жібердім. Қарсыласым сонда да қаймығып қалған жоқ. Сондай шыдамды, төзімді боксшы екенін дәлелдеді. Қанша дегенмен кәсіби бокста 30 жекпе-жек өткізіп үлгерген. Менде біраз уақыттан кейін рингке оралған соң, жекпе-жекте біршама қиындықтар болғаны рас.

Ел нарығына жаңадан енген FightNights ұйымы туралы не айтасың? Көбі сол бокс кешін сынға алып жатты.

FightNights туралы айтар болсам, бұрыннан олардың ММА-дан шоулар ұйымдастыратынын білемін. Алғашында ресейлік менеджерлер хабарласты. Қазақстанда жаңа кәсіби бокс ұйымы ашылатыны туралы айтып, өз ұсыныстарын жеткізді. Ұсыныс көңілден шыққан соң, келісімімді бердім. Иә, Астанадағы бокс кешін сынап жатқандар болды. Бірақ менің көзқарасымда бәрі жоғары деңгейде болған секілді. Ол ұйымға алғысым шексіз.

Шетелде өнер көрсету жоспарды бар ма?

Әрине, мүмкіндік болса мұхит асып, биік белестерді бағындыру ойда бар. Ол жерде өнер көрсету әр боксшының арманы. Өзім Лос-Анджелеске барып, жаттығып, спарринг жасап көргенмін. Мадияр Әшкеев ағамыз өзі күтіп алып, залдарға алып барып, таныстырды. Ол жерде маған бәрі ұнады, қалып өнер көрсеткім де келді. Бірақ жұмыс визасы болмағаннан кейін ол жоспар іске аспады. Бірақ мынаны ұмытпау керек, АҚШ-қа барған соң, ол жерде біраз уақыт дайындалу керек. Оған аз қаржы кетпейді. Артында демеушілер болмаса, ол да қиын. Негізі Германиядан және Жан Кособуцкийдің менеджерінен ұсыныстар болды. Ұсыныс көңілден шықпағаннан кейін, одан бас тарттым.

Биволмен қандай байланыс бар? Әлеуметтік желіде бір-бірлеріңе жазылғансыздар.

Дмитрий Биволмен Абу-Дабиде Рамириспен болған жекпе-жек алдында спарринг жасадық. Бір ай бойы бірге жаттығып, аптасына үш реттен спарринг жасадық. Содан бері жақсы доспыз.

Бетербиев пен Бивол арасындағы реваншқа болжамың қандай?

Бірінші жекпе-жекті толық көрдім. Негізі жекпе-жек аяқталған сәтте Бивол жеңді деп ойладым. Меніңше ол көп соққылар жасағандай болды. Бізге солай көрінді, бірақ әділ бағасын беретін төрешілер бар. Сәйкесінше жеңісті Артурға берді. Ал реванш туралы ойым Бивол бірінші жекпе-жекте жіберген қателіктерін түзеп, жақсы дайындалып осы жолы жеңіске жететін секілді.

Сұхбаттасқан: Айнат Қабидуллаев