Салах Сауд Арабиясына ауысу мүмкіндігі туралы айтты

«Ливерпуль» шабуылшысы Мохамед Салах Мысырдың ON Sports телеарнасына берген сұхбатында болашаққа қатысты жоспарларын айтты. Ағымдағы маусымда 29 гол соғып, 18 нәтижелі пас берген 32 жастағы шабуылшы өзінің ұзақ жылдар бойы ойнай алатынына сенімді.

«Менің ойымша, 39-40 жасқа дейін ойнай аламын, бірақ мансапты аяқтау керек деген сезім пайда болса — ертерек тоқтатамын. Мен көп нәрсеге қол жеткіздім», — деді мысырлық.

Салах жақында Сауд Арабиясының клубтарымен келіссөздер жүргізгенін растады, онда оған 500 миллион фунт стерлингтен астам сомаға келісімшарт ұсынылған. Алайда футболшы «Ливерпульмен» келісімін ұзартуды жөн көрді.

«Сауд клубтарымен жақсы қарым-қатынастамын, біз байланысты үзбейміз. Мен Ливерпульде бақыттымын және алдағы екі жыл осында боламын. Содан кейін не болатынын көреміз», — деп қосты Салах.