Салах Сауд Арабиясының рекордтық ұсынысынан бас тартты

Мохамед Салах мансабын “Ливерпульде” жалғастыруға шешім қабылдады, мысырлық шабуылшы клубпен жаңа екі жылдық келісімшартқа қол қойды.

Келісімшартты ұзарту туралы келіссөздер наурыз айының соңында аяқталды, Футболшы аптасына 400 мың фунт алатын болады. “Ливерпульдің” спорт директоры Ричард Хьюз ойыншының өкілі Рами Аббас Иссамен келісімге келді.

Сауд Арабиясы Салахқа 500 миллион фунт жалақымен келісімшарт ұсынды, алайда шабуылшы қаржылық пайдадан гөрі спорттық амбицияларды таңдады. Мысырлық “Ливерпульмен” Англия чемпионатын және Чемпиондар лигасын жеңіп алуды, сондай-ақ “Алтын доп” үшін күресуді көздейді.

Шешім қабылдауда футболшы отбасының Мерсисайдтағы бейімделуі маңызды фактор болды — оның жұбайы Маги мен қыздары Макка мен Каян Англияда өздерін жайлы сезінеді. Салах сондай-ақ Мысыр құрамасындағы алдағы турнирлер алдында жоғары формада болуды жоспарлап отыр.