Рублев Дубайдағы былтырғы дисквалификациясына қатысты пікір білдірді

The National басылымының хабарлауынша, Андрей Рублев Дубай турнирінде бір жыл бұрынғы дисквалификациясы туралы пікір білдірді.

Теннисші Александр Бубликпен жартылай финалда сызықтық төрешіге дөрекілік көрсеткені үшін жарыстан шеттетілген еді. Бұл тәртіп бұзушылық үшін спортшы 36 400 доллар айыппұл төледі, бірақ рейтингтік ұпайлары мен жүлде қаржысын сақтап қалды.

Бәрі ұмытылды, сіз сұрамағанша, бұл туралы ойламадым да. Бұл оқиға өткенде қалды деп үміттенемін. Шынын айтсам, бұл жақсы ма, жаман ба — білмеймін, бірақ мені бұл мүлде алаңдатқан жоқ: қорқынышты түстер көрген жоқпын, кортқа шығуға да қорыққан жоқпын, — деді Рублев.

Әңгіме соңында ол спортта түрлі жағдай болатынын атап өтті: кейде нақты бұзушылық үшін әділ жаза қолданылады, кейде санкциялар негізсіз беріледі, ал кейде тәртіп бұзушылық мүлде байқалмай қалады.