«Рома» аңызы Тотти: А Сериясындағы клубтар мені әлі де шақыруда

Аты аңызға айналған итальяндық футболшы Франческо Тотти мансабын аяқтағаннан кейін де футбол әлемінде назар аудартуды жалғастыруда. «Рома» клубының бұрынғы капитаны жақында күтпеген мәлімдеме жасап, жанкүйерлер мен сарапшылар арасында үлкен қызығушылық тудырды.

2017 жылы керемет мансабын аяқтаған 48 жастағы Тотти әлі де А сериясы клубтарынан алаңға оралу туралы ұсыныстар алғанын мойындады. «Ромадағы» мансабында ол 786 матч өткізіп, 307 гол соғып, римдік клубтың нағыз символына айналды.

«Маған А сериясы командаларынан қоңыраулар түсті. Бұл мені біраз ойландырды, өйткені бұл аздап ақылға сыймайтын нәрсе», – деп бөлісті Тотти.

Ол өзінің физикалық дайындығы жайлы да сөз қозғап, ойынға оралу үшін екі-үш айлық қарқынды жаттығулар қажет болатынын атап өтті. Алайда, егер ол алаңға қайта шықса, тек Италияда ойнағысы келетінін айтты.

Сонымен бірге, Тотти «Романың» басты қарсыласы «Лацио» сапында өнер көрсету мүмкіндігін толықтай жоққа шығарды:
«Лацио? Мұны тіпті қарастырмас едім», – деді ол.

2006 жылғы әлем чемпионы болған Тотти мансапты аяқтау туралы шешімнің өз таңдауы болмағанын мойындады. Бұл оның футболға оралу ойларынан неге әлі де арылмағанын түсіндіреді.

«Сіз өміріңіздің бір кезеңін аяқтағанда, алда не күтіп тұрғанын ешқашан білмейсіз. Бұл менің таңдауым емес еді, бірақ сол кезде басқа өмір сүру керек болды», – деп бөлісті Тотти.

Осы уақытта оның туған клубы «Рома» қиын кезеңді бастан кешіруде. 2023-24 маусымының сәтсіз басталуынан кейін клубтың тағы бір аңызға айналған ойыншысы Даниэль Де Росси жұмыстан босатылды. Қазір команда жаңа бас бапкер Иван Юричтің жетекшілігімен чемпионаттың турнир кестесінде 10-шы орында тұр. «Рома» төрт матчтың екеуінде ғана жеңіске жете алды.